الاثنين، 8 أبريل 2013


انا الشعب انا الناس انا المشاكل ....


انا المواطن اللي بيتزعق فيه ... 
انا المواطن اللي مكسور عينيه ... 
انا المواطن اللي مفيش حاجه بايديه ...
انا الماضي والحاضر للثوره ... 
انا اللي كشفته ليه العوره ... 
انا اللي موتوني ف ماتش الكوره ... 
انا اللي عندي حكومه حوله ... 
انا اللي عندي حكومه مش مسءوله ... 
انا الفقير الجعان ... 
انا اللي نفسي يكتبوا في بطاقتي انسان ... 
انا اللي عاملوني اوسخ من الحيوان ... 
انا اللي هزعق واعمل قلبان .. 
انا اللي مشفتوش منه غير الاحسان ... 
انا اللي ما ارضي ع نفسي الاهانه ... 
انا اللي مهما وطونا ربك علانا ... 
انا بلد الشهداء ... 
انا بلد المليون داء ... 
انا الحقير اللي ثار ... 
انا اللي هموت من الجوع ... 
عشان صوتي مش مسموع ... 
و الفكر عندي مسموم. ... 
والفقر مقطع الهدوم ... 
انا اللي مش لاقيلوا بيت ... 
انا اللي عموني بالسكر والزيت ... 
مازلت انا المجنون اللي عاش 
والعاقل اللي مات ... 
انا اتكلم من كتر السكات ... 
انا المحروم واليتيم ... 
انا اللي ظلمني الحاكم البهيم ... 
انا المعتقل والسجين ... 
انا فرموني زي العجين ... 
انا الشعب ,... 
وداسو عليا بالكعب ... 
انا اللي كان ساكت بس نطق ... 
انا خرسوني واتكلمت وزال الخرس ... 
انا اللي بتكلم ومش فاهم 
مع اللي فاهم ... بس عايز بلدي احسن
انا المصري ... 
انا الانسان اللي اتوجع ... 
انا اللي من تكدير الزمن ليه ... شبع ... 
انا اللي الحق كان مجرد شبح ... 
انا اللي اترمي واتكفر واتدبح ...
انا اللي ثار وصوتي اتنبح ... 
وبقيت ارخص حاجه في البلد ... 
رغم كده شكر ربه وحمد ... 
ملعون ابو البلد مات الولد ... 
الشهيد اتخلدت ذكراه وخلد ... 
انا اللي مخي اتعدم ... 
انا اللي بره عند اخواتنا اتشتم ... 
انا اللي اعتقلوني عشان اتكتم ... 
الشعب خلاص جاب اخره..ارحل !! هيهات ... 
الخرفان من لا شيء بقو حاجات ... 
وزادت الاهات ... مع زياده الخطابات ... 
الرءيس خلاص زاااط ... اهات ... 
انا اللي اتسحلت دفعولي اسكت ... 
ولا يقتلوني ... 
رموني بالرخيص باعوني ... 
يا بلد ارخص مافيكي الانسان ... 
الانسان بيغلي بالجوازات والاعلام ... 
لمه بطلع بره بلدي ... علي طول متهان ... 
قال يعني فيها كنت عالي ... 
عمري مكنت غالي ... 
انا مصري ... واللي قلل مقداري عصري ... 
عزيز ... والعزه تبان في نسري ... 
طيب والطيبه ابيض في علمي ... 
والسواد بيشرح المي ... 
هكتب اكتر محدش هيكسر قلمي ...
انا الدمعه في عبون اام الشهيد ... 
انا اللي النادي بتاعي ... الدم في الوريد ... 
انا اللي انتاصره ليه عيد ... انا لمه ابطل 
اشجع هكون ميت اكيد ...
انا اللي قلت الشعب ايد واحده ... 
والسم والفتنه بينتشروا وحده وحده ... 
انا و اخويا المسيحي روح واحده ...
انا اللي شفت منه الشهامه والمسانده ... 
القبطي اخويا ابدع في المساعده ... 
مسيحي ومسلم حطها في دماغك قاعده ... 
مصيبته هي مصيبتي ... مشكلته بقت مشكلتي .. 
ربنا يقوينا ونقف ع رجلينا ... 
وساعتها هنجيب الحق بادينا ...

معقول يا ريس !!!!

يا ريس حرام عليك مش معقول ...

هصرخ واقول فاشل مش مسءول ... 
ده الحرامي كان فكره ع الاقل معدول ... 
الخرفان هيكفروني ويقولو عليا فلول ... 
فلول لمخلوع حمي ارضنا مش فيلم معمول... 
مش هقول انه لم يخطي ﻻ ...
ده ضحك ع العقول ...
اه خلص علينا الرصاص... 
ونزلنا قلنا "ارحل" وطالبنا بالقصاص ... 
حكمونا الاخوان ولبسنا قرطاس ... 
اه ياللي ماتوا ملهمش ديه ... 
عالم ربك بكره ليك ولا ليه ... 
وحلايب وشلاتين ... وارض الجمعيه ... 
مصر بين قوسين ((( مرسي صاحب التيكيه )))
ارضهم خلاص ... اه مرارتي وامراضي القلبيه ... 
كفروا علمانيه ووسطيه و ليبراليه ... 
واللي يسخر منهم وقالو اراجوز عنده امراض عقليه ... 
اهو عملها فيكوا واداكو برايز ... 
يمكن تحسوا وترجعوا فيها جايز ... 
ردهم كان : قاعدين فيها عايز او مش عايز ...
اه يا عمارات مصر بدون اساس ... 
والقتل فيكي يا بلد بدون احساس ... 
والفكر باظ وبقيت محتاس ... 
احاكم الرءيس ولا الناس ... 
الفكر باظ واختي في الطريق مفيش امان ... 
ملعون ابو الشهوه خليك انسان ... 
مهو بحركاتك دي هتبقي اقل من حيوان ... 
المشكله مبقتش في الهدوم ... 
بنقاب يتحرش بيها عن الشهوه مسجون ...
زاد عدد الذكور و قلت الرجاله ... 
مترضهاش ع اختك ﻻ استحاله ... 
كلها ديون ع دماخك ومصيرها ترجع ... 
هيتحرشوا باختك وتقول اخ ضربه توجع ... 
يا بلدي انضفي وارمي الزباله بعيد ... 
المرتشي الحرامي المتحرش و الرءيس ...